俾晒錢，就開始了每月供樓的日子。供了9個月樓 (樓花期唔算太長)，終於等到收樓的日子!
收樓前，發展商會透過律師樓發信，通知收樓日期和收樓安排，不過原來入伙雜費開支都唔多，收樓又要洗一筆。收樓時，要付一個月管理費上期、三個月管理費按金、相等兩個月管理費的設備基金，以及相等管理費一個月的泥頭費，加埋成七個月管理費，總共1萬多元。
新樓管理費都幾嚇人，新居的呎數同我們以前住的單位差不多，但係管理費就差不多貴了一陪。講真，管理費開支佔供樓開支10%，我覺得好誇張。
預約收樓之前，我們決定搵專業驗樓師幫忙驗樓。我以前一向有睇有線的樓盤傳真，睇開詹Sir驗樓，所以我們就搵詹Sir。因為收樓後，一星期內要填報單位損壞資料，交由發展商執漏，所以最好約了驗樓師才預約收樓日期，我們就約了詹Sir驗樓之前一日先收樓。
2015-11-06
(Fri) 收樓
收樓當天，交樓處職員首先幫我們辦理住戶登記、拍照等，跟住簽了一大堆文件和繳交我之前提過果萬
幾蚊管理費入伙雜費。之後就收取單位鎖匙，單位鎖匙、冷氣機遙控器和USB 手指 (USB裡面有家電說明書 pdf files)都係放在一個大盒裡面，第一眼見到個盒，我心諗個盒洗唔洗噤大呀! 收到鎖匙，職員帶我們上樓。
我係到收樓前一晚，忽發奇想覺得我個單位有機會有景，雖然單位座樓對面正正就係另一座樓，距離有點近，不過我個單位算高層，有機會高過對面的樓層。買樓時根本冇考慮到景觀問題，主要考慮單位間隔和價錢，基本上買市區樓都唔expect會有靚景。
登登登…開門一刻，心情少許緊張! 買樓花，永遠都不知道單位的真實狀況和景觀。
門一開打開，見到我個單位真係高過對面的樓層，觀景算開揚，望到個球場，我們都非常高興。
交樓處職員簡短介紹單位設施就完成收樓儀式。
2015-11-07
(Sat) 驗樓
收樓後第二日，約了驗樓師詹Sir幫忙驗樓。詹Sir和佢team 人，一行5人準時到達。
佢地花了半小時就已經完成驗樓，重即場打印兩份驗樓報告俾我們。
驗樓報告一色兩份，一份俾我們交俾發展商執漏，另一份我們自己保存。 大約500呎的單位，驗樓收費大約2千5。
根據驗樓報告的損壞清單，我先影相為證，之後先交俾發展商執漏。新盤保養期每個發展商都不同，我這個盤保養期只有半年，發展商用了兩個月執漏，非常慢。我建議大家一定要追緊發展商跟進執漏，唔好俾發展商「歎慢板」。
No comments:
Post a Comment