2017 東京近郊賞楓之旅 ~ 前篇

雖然今年四月的“2017北海道賞櫻之旅”都未開始寫，但係又係時候計劃下次旅行。

年尾決定去番轉東京，主打去東京近郊。其實係因為波生睇完四重奏之後，話想去輕井澤，所以先有個去東京的念頭，不過當我研究完東京嘅景點之後，今次應該唔會去輕井澤。 我比較想去睇富士山，打算去箱根住番晚。

今次會與父母同行, 我已經問咗波生，佢都冇反對。其實決定與父母去旅行，係因為佢地成日都會提住佢地的朋友們剛剛同仔/女/身抱/女婿/孫去完日本自由行，好好玩之類，俾咗少少壓力我。不過諗深一層，父母都年紀大，佢地對腳都開始唔聽洗，其實又可以跟到我去幾多次旅行?雖然上年我都已經同佢地去咗韓國首爾，不過我都想同佢地去一次日本自由行。

雖然佢地已經跟團去過幾次日本，但係身為父母一定會覺得同個女和女婿去好玩好多。阿媽一直想去日本睇紅葉，今次旅行就可以滿足佢。

另外，阿爸阿媽都比較害羞, 接受唔到去公眾温泉，因為佢地之前係跟團，同團友一齊浸係比較尷尬。 所以我會安排住一晚箱根温泉旅館，要每間房都有私人風呂的，等佢地可以一試浸溫泉。

希望7日旅程會頂得順我阿媽……有時候佢真係好煩，最怕佢樣樣都話唔食！

日本紅葉預測已經出咗，高尾山 11月14日會出現紅葉，我都考慮今次去高尾山睇紅葉。

日本紅葉預測

https://weathernews.jp/s/topics/201709/040005/